admin
काठमाडौँ — बुण्डेसलिगा च्याम्पियन बायर्न म्युनिखले यो सिजनको आफ्नो अन्तिम खेलमा एफसी कोल्न (FC Koln) लाई ५–१ को भारी गोलअन्तरले पराजित गर्दै सानदार जित दर्ता गरेको छ. घरेलु मैदान एलायन्ज एरिनामा भएको खेलमा कप्तान ह्यारी केनको उत्कृष्ट ह्याट्रिकको मद्दतले बायर्नले आफ्नो उपाधि उत्सवलाई थप स्मरणीय बनाएको हो.
पहिले नै लिगको उपाधि सुरक्षित गरिसकेको बायर्नले सिजनको अन्तिम खेलमा पनि आक्रामक खेल प्रदर्शन गर्यो. खेलको दशौँ मिनेटमा जोसुवा किमिचको पासलाई सदुपयोग गर्दै ह्यारी केनले गोलको खाता खोलेका थिए. त्यसको तीन मिनेट नबित्दै (१३ औँ मिनेटमा) केनले फ्रि-किकमार्फत व्यक्तिगत दोस्रो गोल गर्दै टोलीको अग्रता २–० मा पुर्याए.
खेलको १८ औँ मिनेटमा कोल्नका सेद एल मालाले एक उत्कृष्ट सोलो गोल गर्दै खेललाई २–१ को स्थितिमा ल्याए र पाहुना टोलीलाई खेलमा फर्काउने प्रयास गरे. तर, बायर्नले यो दबाबलाई धेरै बेर टिक्न दिएन. २२ औँ मिनेटमा युवा खेलाडी टम बिसोफले डिबक्स बाहिरबाट प्रहार गरेको उत्कृष्ट बल गोलमा परिणत भएपछि बायर्नले पहिलो हाफमै ३–१ को बलियो अग्रता लियो.
दोस्रो हाफमा पनि बायर्नको दबाब कायमै रह्यो. खेलको ६९ औँ मिनेटमा केनले लामो दुरीबाट प्रहार गर्दै आफ्नो ह्याट्रिक पूरा गरे र खेललाई ४–१ को स्थितिमा पुर्याए. यस ह्याट्रिकसँगै केनले यो सिजन लिगमा आफ्नो कुल गोल संख्या ३६ पुर्याउँदै बुण्डेसलिगाको शीर्ष स्कोरर (Top Scorer) का रूपमा सिजनको अन्त्य गरेका छन्.
खेल सकिन सात मिनेट बाँकी छँदा (८३ औँ मिनेटमा) निकोलस ज्याक्सनले लुइस डियाजको पासमा गोल गर्दै बायर्नको ५–१ को फराकिलो जित निश्चित गरे.
यो जितसँगै बायर्न म्युनिखले कीर्तिमानी १२२ गोल गर्दै यो सिजनको लिग अभियान टुङ्ग्याएको छ, जसले बुण्डेसलिगाको इतिहासमै एकै सिजनमा सबैभन्दा बढी गोल गर्ने अघिल्लो कीर्तिमान (१०१ गोल) लाई तोडेको छ. लिगको सुखद अन्त्य गरेसँगै अब बायर्नको ध्यान आगामी डीएफबी–पोकल (DFB-Pokal) फाइनलतर्फ केन्द्रित भएको छ.
